ek aarzu ALLAMA IQBAL

ek aarzu

duniyā kī mahfiloñ se uktā gayā huuñ yā rab

kyā lutf anjuman kā jab dil hī bujh gayā ho

shorish se bhāgtā huuñ dil DhūñDtā hai merā

aisā sukūt jis par taqrīr bhī fidā ho

martā huuñ ḳhāmushī par ye aarzū hai merī

dāman meñ koh ke ik chhoTā sā jhoñpaḌā ho

āzād fikr se huuñ uzlat meñ din guzārūñ

duniyā ke ġham kā dil se kāñTā nikal gayā ho

lazzat sarod kī ho chiḌiyoñ ke chahchahoñ meñ

chashme kī shorishoñ meñ baajā sā baj rahā ho

gul kī kalī chaTak kar paiġhām de kisī kā

sāġhar zarā sā goyā mujh ko jahāñ-numā ho

ho haath kā sirhānā sabze kā ho bichhaunā

sharmā.e jis se jalvat ḳhalvat meñ vo adā ho

mānūs is qadar ho sūrat se merī bulbul

nanhe se dil meñ us ke khaTkā na kuchh mirā ho

saf bāñdhe donoñ jānib buuTe hare hare hoñ

naddī kā saaf paanī tasvīr le rahā ho

ho dil-fareb aisā kohsār kā nazāra

paanī bhī mauj ban kar uTh uTh ke dekhtā ho

āġhosh meñ zamīñ kī soyā huā ho sabza

phir phir ke jhāḌiyoñ meñ paanī chamak rahā ho

paanī ko chhū rahī ho jhuk jhuk ke gul kī Tahnī

jaise hasīn koī ā.īna dekhtā ho

mehñdī lagā.e sūraj jab shaam kī dulhan ko

surḳhī liye sunahrī har phuul kī qabā ho

rātoñ ko chalne vaale rah jaa.eñ thak ke jis dam

ummīd un kī merā TuuTā huā diyā ho

bijlī chamak ke un ko kuTiyā mirī dikhā de

jab āsmāñ pe har sū bādal ghirā huā ho

pichhle pahr kī koyal vo sub.h kī mo.azzin

maiñ us kā ham-navā huuñ vo merī ham-navā ho

kānoñ pe ho na mere dair o haram kā ehsāñ

rauzan hī jhoñpaḌī kā mujh ko sahar-numā ho

phūloñ ko aa.e jis dam shabnam vazū karāne

ronā mirā vazū ho naala mirī duā ho

is ḳhāmushī meñ jaa.eñ itne buland naale

tāroñ ke qāfile ko merī sadā dirā ho

har dardmand dil ko ronā mirā rulā de

behosh jo paḌe haiñ shāyad unheñ jagā de